بزيادة كده

ام عجلة الانتاج دي


مهو الطالب بيذاكر قبل الثورة واثناءها و بعدها والدنيا اجازة مطلوب منه يعمل ايه في الاجازة غير ما هو معتاد؟


مهو الموظف بيشتغل قبل الثورة و اثناءها وبعدها والمطحون مطحون و المتهني متنهي ولا عزاء لعدل في اي مكان عمل


مهو صاحب المصنع ولا الشركة شغال او مش شغال ليها سبب .. واللي خلاه يعمل مصنع او شركة هيخليه عارف كويس قيمة الايد الشغالة و ان كان ظالمها هيحاول يديها اقل القليل علشان يمشي الدنيا مع العلم ان الاغلبية منهم ظالمين وواكلين حقوق موظفينهم


مهو الارزقي حاله زي ما هو قبل الثورة و بعدها .. مبيض ميكانيكي مندوب مبيعات اي شغلانة مش ثابت فيها رزق اليوم هي هي 


لا الناس بطلت تاكل وتشرب وتخرج و تتفسح وتنام وتشتغل وتتجوز و تسافر وتروح وتيجي و لا الفقير اتنغنغ من النعيم اللي انعمت عليه بيه الثورة المحروسة بالبنادق والدبابات


لا شفنا العشش بقت سرايات و لا حتي 4 حيطان ولا شفنا الصحرا اخضرت بعد ما اكلتها الكومباوندات 


ام العجلة دي اللي هي واقفة عند مين ف دول باه ؟؟؟؟؟؟؟؟؟


هو مش قوام الشعب المصري موظفين و فلاحين و عمال و طلبة ؟ ولا في فئات اخري من الشعب؟ طبعا بالاضافة الي العواطلية و اصحاب المعاشات وكبار السن


سكان العشوائيات هم هم 
سكان القصور هم هم 


اه و الفلاح حاله كما كان لا شفنا قمح اتزرع و سنابله هفهفت علينا ولا سمعنا انهم هيرجعوا الاراضي المخصصة للزراعة بتاعت الصحراوي وغيرها .. يا دوب هيبقوا ياخدوا فروق اسعار كتر خيرهم


اما وان العجلة دي من ضمن مخلفات العصابة لزوم رفع معدلات التنمية و التضخم و التعداد السكاني المنفجر و الهلس دا بالاضافة لرفع ضغط دم اللي عنده منه اصلا ,, 


اعقلوا يا بشر قبل ما تفضلوا تسفوا في شريط لا بيودي ولا بيجيب


كل اللي طالع علي الناس نبني بنبي نبني 


هو كان اهالينا خلفونا فواعليه ؟؟
ما كل واحد مرمي في مكانه بيجري علي لقمة عيشه و يا ريته عاجب


تطلعلنا المذيعة المحفلطة من دول وتقولك ندي فرصة يا جماعة و العجلة تدوب و البلد بتخرب و الاقتصاد منهار و ياخدها من بقها كل من هب ودب ولا يفهم هي قالت ايه اساسا و الشريط يفضل يسف


يا ريت كل واحد يسال نفسه هو ايه الضرر الواقع عليه هو شخصيا قبل و اثناء وبعد الثورة  و يا حبذا لو غمض عنيه كده و حلم لثواني ممكن كان تبقي مصر دي ازاي لو الثورة دي نجحت بما يرضي الله  ... الثورة مش الترقيعات الاصلاحية 


اما واني تضررت من ساسي لراسي من الهلس الدائر حولينا... فأسال الله العافية وان يتم علينا رمضان بنصر مبين ليحق به الحق و يبطل به كل باطل 


و اللي بيعمل حاجة يتقنها و يعملها بما يرضي الله وان فشلت فهي قضاء الله وقدره ولله الامر من قبل ومن بعد


( حتي الثائر يلتزم باتقان العمل مش بالتشرذم والتفرق والتنكيل بكل من قسم معاه اللقمة كل يوم والتاني)




لا وكله كوم واليوم اللي ما يعلم بيه الا الله اللي ظبط ارسال قناة الفراعين دي و لقيتها (الله يسامحه الحر بيلم بلاوي) .. ايه الاعاجيب دي .. دا غلب اللتاتة والدلالة وام لبانة .. بجد قميء اووووووي .. ربنا يعافينا


سبب الكلام بعد طول سكات اني اتكعبلت في كتيب دعاء المتوفي بعد صلاة العشاء وزعته بنت صغيرة وعلي اول صفحة منه زينة الشباب الشهيد محمد جمال رمضان - 17 سنة .. اتضرب بالنار قدام قسم مشهور ببشاعته يقينا مش سمعة وبس، و علي اللي سمعاه من الست اللي ورايا انه كان بيفادي ست وبنتها من الضرب فاتضرب هو ومات. بقول ورايا لاني من صدمة قراءة اسم (الشهيد) الزمن وقف في فترة ثبات او شلل عن التعبير نهائي. لحد ما ادركت ان كل او اي مواساة تتقال لا هتعوض ولا هتخفف حرقة دم امه في السواد اللي هي عيشاه من بعده


الواحد شايل وساكت ومستحمل بس كده كتير اوووووووووووووي


بزيادة كده