"ثق انك مش هتاخد حاجة من الدنيا دي الا و هتدفع تمنها "
الحقيقة باه بالاضافة لكده
احنا بنقول عايزين الاخرة
نتعب في الدنيا ونقول معلش عايزين الاخرة
نتعب و نحزن و نقاسي و نتحمل ونقول عايزين الاخرة
يعني بندفع تمن الآخرة ؟؟
اه الدنيا بتدينا ساعات الحمد لله
بس العادي بتاعها انها بتاخد
وبنرجع نقول معلش
اصل دا من تمن الأخرة اللي بندفعه
وكل اما ندفع اكتر نقول
ان شاء الله الاخرة احسن
دا طبعا بعيدا عن العبادات بكافة اشكالها و اجورها التي لا يعلمها الا الله
بتكلم عن حاجات بتتدفع في الدنيا
بنسكن الالم بتاعها و نقول معلش ان شاء الله الاخرة احسن
بنت متجوزتش تقول الاخرة احسن
ست مخلفتش تقول الاخرة احسن
ام عاقها ولادها تقول الاخرة احسن
اللي اتاخد منه اي حد او حاجة في الدنيا
كله بيقول معلش الاخرة احسن
وان هو مقالهاش
هيلاقي اللي جنبه بيصبره ويقول معلش الاخرة احسن
اللي بيفرح باه في الدنيا
لو ركزنا هنلاقيه دافع تمن الفرح دا من حاجة تانية
زي ما في حد بيتوفاه الله في نفس اللحظة بتلاقي مولود اتولد
كفتين الميزان لازم يفضلوا متوازنين
عدل
انصاف
اخد و عطاء
بدفع من جهدي ووقتي واتعب علشان اقبض مرتبي اخر الشهر
وادي منه لغيري اللي تعب لي في حاجة ودا اجره عليها
و غيري يدي غيره
بدفع و بلاقي
بيختل الميزان لما ادفع وملاقيش
لما اتعب و مجنيش تمن تعبي
لما يرتاح غيري واتعب بداله
ياخد هو كله راحة واخد انا كله تعب
بس للحق
محدش بيتعب كل الوقت
ومحدش بيرتاح كل الوقت
ان فرحت النهاردة بكرة في تمن قدام الفرح دا
وان تعبت النهاردة بكرة في تمن قدام التعب دا
يمكن اخده بكرة ويمكن اخدته امبارح و مأخدتش بالي
بس هي الدنيا
خد بس هات
هات مصاريف المدارس غليت او رخصت
خد بيهم تعليم لحاجات مهما عملت مش هتعرف تعلمها ليهم ابدا
هات حنية ام لاولادها النهاردة
خد بكرة من اللي اتخزن جواهم بسبب اللي اديته امبارح
ممكن استني يوم واحد كل فين وفين
يكون هو اليوم دا بعينه اللي تعبت علشانه
واتمني الاقي فيه تمن تعبي وان مجاش يومها ارجع تاني اقول
معلش في الاخرة احسن ان شاء الله
لو فتحنا صفحة بيضاء
كل يوم سجلنا دفعنا ايه
كل يوم كتبنا اخدنا ايه
تفتكر ممكن نطلع مظلومين ؟
بيتهيألي هنطلع مديونين للدنيا
بالرغم من كل اللي بتعمله فينا
الكلام دا بحساباتنا احنا
امال بعفو ورحمة الله هنطلع ايه
يا تري الكسبان هو اللي هيخرج من الدنيا له ومش عليه؟
يا تري ممكن الواحد يعرف يحسبها اصلا؟
بيتهيألي مهما كنت امينة في الحساب
عمري ما هعرف احسبها صح
يمكن ادالي حاجة مفهمتهاش صح
يمكن اداني من غير ما ادي
يمكن اللي اتاخد مني قبضت تمنه قبل حتي ما الحق اسجله
حكاية تحير
اديتها ولا اديتني
اخدت ايه و خدت مني ايه
اللهم اخرجنا منها علي خير واحسن خاتمتنا و طهرنا من الذنوب والخطايا واجعل الجنة مثوانا
مرات اسرح كده وافكر انهي بني ادم حوليا ممكن اقول عليه بكل ثقة هو دا المرتاح
يمكن الست اللي واقفة بتبيع عيش في الشارع؟
ارجع اقول مهي بستحمل سخافات الرايح والجاي وفي الاخر تمن التعب قروش ..
يمكن البيه المدير اللي بيقبض ألوف و عايش في افخم البيوت و يرتاد احسن الاماكن؟
ارجع اقول كل اما المال بيزيد كل اما بتزيد قنوات الانفاق وكل اما بيزيد القلق ليخلص يقوم يتعب زيادة علشان يكتره و يفضل في قلق وبردة مش هو دا المرتاح
يمكن في العابد اللي محافظ علي الصلاة والصوم وكافة العبادات و قائم نائم في معية الله؟
ارجع واقول مهو لازم يكون بيشتغل و يكون اسرة و يعمل باللي بيتعبد بيه علشان يكون له اجر .. هو دا مرتاح نفسيا غالبا .. بس ساعات اقول يمكن هو بيحاول يقرب من ربنا اكتر واكتر لانه مش مرتاح؟ ولا يمكن مرتاح وعايز يزود الراحة ويعلي من مكانته؟
مش عارفة
بس لو فكرت اعمل زيه
طيب مهو الدنيا فيها التزامات مادية عليّ وعلي غيري
ممكن نكون الانسان دا ازاي؟؟؟؟؟؟
اه بنحاول نقرب من ربنا كل واحد بطريقته وبما فتح الله عليه
بس بردة الاحساس انك مش قريب ومقصر وتقدر تعمل احسن من كده مليون مرة
بس انت وحش اوي لانك مش بتعمل اللي تقدر عليه وانت عارفه وعارف السكة منين :(
اللهم اعنا علي ذكرك وشكرك وحسن عبادتك
يا تري كده نبقي دفعنا تمن الاخرة ؟؟
اشك
لو اضفنا علي عملنا العبادات و اجرها
تكفي تمن الاخرة؟
اشك
لو اضفنا علي عملنا والعبادات والاجر .. رحمة الله التي وسعت كل شيء
تكفي تمن الاخرة ؟
نتمني علي الله ولا يكتر عليه شيء
اللهم ادخلنا الجنة بغير حساب ولا سابقة عذاب
تذكر دائما :
عفوا رصيدك لا يكفي
من فضلك حاول التقرب الي الخالق
لعله يمن عليك برصيد ينقذك
هناك 8 تعليقات:
ماشاء الله
ربنا يسعدك دنيا واخرة
افكار حلوة قوى
محتاجة تتحس وتتذاكر وتتراجع كل شوية
علشان نتاكد فعلا
ان الدنيا مهما اخدت مننا
لكن اكيد مش مظلومين
ربنا يرضينا
ويلهمنا طريقه
فعلا زى ما قالت حفيدة عرابى .. ما شاء الله عليكى كتابات أصبحت ناضجه اووى ومدروسه يا اليس ربنا يزيدك ويحميكى ... يارب يستر ويكون فيه لسه رصيد ما بقاش فى الدنيا قد اللى راح .
ملحوظه :-
ربنا يسامحنى انى بسرق من وقت الشغل عشان ادخل مدونتك بس فعلا بكون زهت من الانجلش ده دعاوتك يا طيبه .
قصدى دعواتك مش بقولك الواحد خلاص كبر . ... وبرضو اسمها زهقت مش زهت ايه حكايتى بأه .
فكرتيني بكلام الدكتور مصطفى محمود و قانون مهم من قوانين الفيزياء
لكل فعل رد فعل مساوي له في المقدار و مضاد له في الاتجاه
احنا بنأخذ علشان نعطي ... و في نفس الوقت بنعطي علشان نأخذ
احنا بنشتغل .. بنقبض .. بندفع .. بنشتغل .. بنقبض .. بندفع
لكن ده ما يمنعش ان لكل شئ حسابين .. حساب في الدنيا و حساب في الآخرة
ان الرصيد دائماً لا يكفي ... لو اتحسبت بالعقل كان هيكون لا يكفي فعلاً
لكن
رحمته وسعت كل شئ
مش عارف أبدي إعجابي بإدراجك ده إزاي
دعوة طيبة من قلبي تكفي ؟
حفيدة عرابي :)
اللهم انا وانتي والمسلمين اجمعين :)
ربنا يتقبل دعائك و يرضينا ويرضي علينا ويلهمنا طريقه يارب
نورتي يا استاذة:)
وخليكي فاكرة اننا مستنيين باقي هذا الرجل احبه :)
راجل صعيدي
الله يكرمك علي ذوقك .. ربنا يعافينا جميعا .. الفكرة في حد ذاتها مرعبة بس رحمة الله وسعت كل شيء وان شاء الله يغمرنا بعفوه ورحمته
موفقك بإذن الله
ولد تحت الصفر
الله يفتح عليك
هي فعلا شبه القانون دا مع اختلافات كبيرة احيانا كتيرة
ساعات تدي كتير وتاخد قليل و الباقي عند الله و ساعات تاخد كتييييييير من عند الله وانت مديتش حاجة .. سبحانه العاطي الوهاب .. كريم وحنين ..
لكل شيء حسابات مش بس حسابين .. حسابات مفتوحة للدنيا و حساب الاخرة عند الله علمه
الحمد لله رب العالمين
:) دعوة طيبة تكفي وزيادة ولك بمثلها ان شاء الله
:) فرحتني دي
ربنا يسعدك يا محمد ونسمع منك عنك كل خير ان شاء الله
السلام عليكم ورحمة الله وبركاتة
اخبارك اية يااختنا الغالية
معلش اتشغلنا بس شوية عنك وعن مواضيعك الجميلة وربنا يباركللك يارب ويسعدك دنيا واخرة اللهم امين والمسلمين ...
كلمة صدق
تحياتى
=======
السعادة تتواجد فى عقل السعيد لا فى الواقع الجميل المجيد/
فكم من سعيد لا يملك من مقومات السعادة من قديم او جديد/
وعايش متهنى ولا يملك الا البساطة وكل شىء عنده مفيد/
بالبشاشة والسماحة والرضا شايف كل يوم من ايامة عيد/
ويرى ما ينقصه من ضروريات كتمرين من العاب الحديد/
تزيده لياقة وصحة وعقل سليم فى جسم حليم وكل له رصيد/
ومن يحمد الله ويشكره على القليل يبارك الله فيه وينمو ويزيد/
فاسعد نفسك بنفسك وخليك كل يوم شخص متفائل بفكر فيه تجديد/
فينك!!؟
إرسال تعليق