الأربعاء، 28 يناير 2009

كلام علي اسئلة ملهاش رد




الخلاف في الرأي لا يفسد للود قضية




جملة ساعات كتيرة بتتقال و بيكون مرسوم علي الشفايف ابتسامة صفرا علي اعتبار خلي الموضوع يعدي يعني ومتعمليهاش مشكلة




حاضر هنعديها ...........




بس انا عندي الخلاف في الرأي في معظم ان مكانش كل الحالات بيؤدي الي افساد جزء من الود و ساعات جزء كبير ..


مش علشان تحكم و رغبة في ان رأيي هو اللي يمشي بس علشان في احيان كتيرة العقل بيقول ان الرأي دا الصح ((مش عقلي لوحدي ..عقول اخري ))




لو الموضوع ميخصنيش بتضايق عليه بنفس الدرجة او يمكن اقل عن ما اذا كان يخصني




اما في اللي يخصني الخلاف في الرأي ساعات كتيرة بيخليني اتجنب المخالف نفسه علشان منتحطش في مكان واحد و نعيد الكلام من اول و نفتح نفس السيرة من تاني و ساعات كتيرة الرأي المخالف هو اللي بيمشي من اول الموضوع ولا من اخره .. المهم ان النتيجة النهائية ان في احيانا كتيرة الرأي الأخر هو اللي بيمشي بس بيمشي فوقي مش بيعدي جنبي ..



هو الدم ليه شكله بقي سهل اوي كده في القريب .. الاول كانت الناس اتعودت من الافلام علي شكل الدم والقتل والدبح من شخصية شريرة .. حرامي .. حد زي عصابة القناع الاسود كده .. يكون لابس مخطط ابيض في اسود و حاطط علي وشه قناع علشان مفيش حد يعرفه ..


دلوقتي الناس شالت القناع و بتلبس احسن لبس و بتقتل اقرب الناس ليها !!


مش هقول ايه اللي يخلي ابن يقتل ابوه ولا اب يقتل ابنه .. من فترة كده كانت المخدرات شماعة تحليلات كتيرة ..بس دلوقتي بقت الحكاية غريبة و تفسيرات الناس ليها اغرب .. الدم اصبح مستباح من كل الناس .. مبقتش تفرق ان كانت الاذية هتجيلي من حد قريب ولا غريب لانها في الاخر اذية و ساعات القريب بيأذي اكتر بكتير و جرحه بيكون اكبر..


ليه اب بيعاقب ابنه بالموت و ليه بيقتله نفسيا احيانا كتيرة .. هو خلل في دينه واخلاقه ولا مجتمع اصبح متبلد لدرجة تخليه يستبيح كل حاجة لنفسه حتي اللي مش ملكه .. مش معني ان ربنا رزقه بطفل نعمة من ربنا انه يستبيح لنفسه يعمل فيه و معاه كل اللي هو شايفه صح .. مين اللي قال انه صح ؟؟ مين قال انه هو نموذج ناجح يستحق انه يعيد في ابنه اللي اتعمل فيه ايا كان حاجة كويسة ولا وحشة .. مين بيحكم و بيحاكم !!!



شيوخ كتيرة صوتهم مش مسموع .. الناس بتكون قاعدة في الخطبة يوم الجمعة مثلا و كل واحد سارح في غلبه و مشاكله و الكلام بعيد اوي اوي عن اللي شايفه .. لو طفل حد اعتدي عليه يروح يشتكي مين ؟؟ لو ابوه الفاعل ولا لو امه ولا خاله ولا عمه ولا اخوه .. في زمنا دا يشتكي لمين !!


الدين بيحل كل المشاكل .. دي حاجة انا مؤمنة بيها بس الدين محتاج تطبيق متفصل علي المشكلة .. محتاج ترزي شاطر يعرف يقسم القماش صح و يفصل للطويل الي يناسبه و للطفل اللي يحتاجه .. بس مين بيعملها كده دلوقتي ..


اذاعة القرآن الكريم جميلة جدااااا بس ساعات الضيوف بيتكلموا بطريقة تخليني نفسي اجري الشريط شوية واسرع الكلام علشان افهم ... مش قلة صبر بس رتابة في الكلام مع انه بيقول كلام مفيد و كويس اوي بس طريقة كلامه و انه بيعمل وقفة علي كل كلمة بيخليني اقوله بتزهق المستمع ليه ليه ؟؟ ليه مش بتكلمه بلغة عربية فصحي و كلام طيب و كل حاجة بس الناس بقت بتعمل كل حاجة برتم اسرع و كلمات اوضح ومصطلحات اسهل .. علشان انا اسمعك و افهمك واللي اقل واللي اكتر واللي اكبر واللي اصغر يعرف يفهم .. والله نفسي الاذاعة دي بالذات تفضل جميلة كده بس يحصلها شوية تحديث وتنويع في الخطاب علشان تبقي لكل الناس زي ما الدين دا انزل للناس كآفة .. بس بردة هتفضل جميلة حتي لو متغيرتش وليها جوايا ذكريات لما كنت بشوف جدتي الله يرحمها فاتحاها علي طول و هي راقدة في السرير بتسمعها ليل و نهار .. ناس راحت وكتير ناس جت و هي بردة هتفضل اذاعة خير دايما ان شاء الله ..



هو الكرسي مينفعش يجي لحد من غير ما يغيره ؟؟ مينفعش حد يعلي منصبه و لا يتعالي هو علي غيره؟؟ ليه الناس بتتوحش اوي لما بتعلي في الدنيا !! مع انها دنيا هتفضل دنيا ولا عمره هيعلي فيها الا اللي عالي شأنه عند ربه ...


نفسي مبقاش لوحدي ونفسي سيف ميشيلش همي

نفسي اكلم اخويا ميقوليش خير في حاجة حصلت؟

نفسي ميبقاش في مشاكل في الدنيا دي



حلو الدعاء دا :


يا مقلب القلوب والابصار

يا مدبر الليل والنهار

يا محول الحول والاحوال

حول لحالنا لاحسن حال


هناك 29 تعليقًا:

غير معرف يقول...

سلام عليكم
( أسئله ملهاش رد ) مش عارف فعلا ارد على حاجات كتير فيها وحاجات تانيه يمكن ردى مش هايقنعك .. المهم بنتى الغاليه كل يوم بتكبر فى نظرى ومتأكد انك كل يوم بتزيدى غلاوه عند الكابتن وبقوله يا سيف انا متأكد من حاجه واحده ان والدتك راضيه عنك وبدعاها ربنا كرمك بالطيبه دى .. يارب يجمعكم قريب وأملنا كبير فى رب العزه .. على فكره فى تحيه خاصه من 2 معايا فى البيت دلوقتى ليكم من حرمنا المصون وأحمد مدحت
و محمد امبارح بالليل والله قلى ضرورى توصل سلامى لسيف وادينى بوصله اما بالنسبه للانسه اللى عندى فخلصت امتحانات من حوالى ساعه وقالت هاترجع على الساعه اتنين دى كل اخبارانا يا ...... ( مش عارف اوصلها كتابه ) حطيت النقط بتاعة اليس وانتوا كملوها بمعرفتكم .
مدحت

غير معرف يقول...
أزال أحد مشرفي المدونة هذا التعليق.
غير معرف يقول...

سلامو عليكم يا عمدة السلام بتاع تمر حنة واحمد وصل والحمد لله انا اطمنت علي الورده يبقي فاضل الكابتن الكبير ربنا يطمني علية والله العظيم بحبوا يا ناس والسلام علي من اتبع الهدي

أميرة يقول...

عليه افضل الصلاة والسلام :)

وعليكما السلام ورحمة الله وبركاته

هتحشر بينكم اشمعني انا يعني :)


-----------

انا علي فكرة بجد محتاجة رد منك باعتبارك اب و رب اسرة وفيها اولاد ربنا يكفيهم كل سوء .. بس عايزاك تفكر معايا بصوت عالي كده وتقولي رايك في الكام حاجة اللي تخص الاسرة

أميرة يقول...

والله نسيت الفلوس وانا بكتب و كويس اني نسيتها لاني لو كنت افتكرتها مكنتوش هتخلصوا من حاجات كتيرة هي السبب فيها


بس انت جبت المفيد بالمثل دا

اللي يحطها علي راسه فعلا لازم يوطي و اللي يعلي عليها اكيد هو الكسبان

ربنا يخليك لي يارب

غير معرف يقول...

سلام عليكم
زى ما قلتى الخلاف فى الرأى لايفسد فى الود قضيه ..(1)انا معاكى فى نقطة التمسك بالرأى وخاصة فى الموضوعات المتعلقه بالشغل وخاصة لما تكون نتيجة التمسك بارأى انا اللى اتحمل نتائجها انا فى الموضوع ده كنت بتمسك برأئى الشخصى مهما كانت النتائج ( وخلى بالك من كنت دى ) ..يمكن عشان الخبره اللى كانت فى مجال شغلى بعتز بيهاومحاولة انى ادرس أى قرار او رأى اتخذه او ان اقوله .
(2)أى أب فى الدنيا لما بيكون عاوز أبنه يعمل حاجه مش عشان يكون زيه لا بالعكس لانه عاوزه يكون أحسن منه .. وللاسف كتير كنت بعاند أبنائى وأحيانا أقسو عليهم عشان ينفذوا اللى عاوزه بس فعلا والله ربنا أكرمنى باللى ساعدتنى فى تغيير بعض اتجاهاتى دى وبنفذ كلامها وبقيت أظهر لهم حبى وخوفى عليهم ( ربنا يكرمها ويجبر بخاطرها ).
(3) الظاهره ( قتل وذبح لقرب الناس )واللى بقيت عاديه زى ما قلتى الاسباب كتير اولها الدين اللى للاسف بقى آخر حاجه فى الدنيا دى اللى طغت عليها الماده واصبحت القناعه شئ نادر والفضل طبعا للفضائيات ومشايخها
وزى ما رد عليكى سيف اللى حط الفلوس تحت رجليه هايرفع راسه والعكس صحيح .
(4) اذاعة القرآن الكريم يا سبحان الله يمكن لغاية 20 سنه فاتت كانت أجمل حاجه ممكن تتسمع فى اى بيت بدأ من تعليم قرأة القرآن بصوت الشيخ الحصرى رحمة الله عليه الى الفتاوى التى تسمعيها وتقتنيع بيها ايا كان مستوى المستمع الثقافى لانها كانت مدروسه وبسيطه ( اسف كنتى لسه فى كجى ون انتى ) بس فعلا لو تم النظر فى الاسلوب الحالى وتم تغيير بسيط يماثل اسلوب عمرو خالد( ومش شرط هو ) لاصبحت بدون مبالغه الافضل .
(5) صلة الرحم تصدقى بالله اصبحت كلمة خير فى ايه او اى اسلوب تانى تتقال الكلمه دى بيه حاجه عاديه فى حياتنا لدرجة اصبح عادى ان اى اب يقول لابنائه ربنا ما يحوجنى ليكم اللى كان من 20 او 25 سنه الابن يقول لعمه ( ابويا فلان ) ربنا يرحمنا .
انا يا بنتى كتبت عشوائى ومش عارف هاتفهمينى ولا لا .
ياريت تعديها ياسيف عشان ما تتصدعش من كلامى وخليك مع كلام بنتى أحسن بكتيييير .
ربنا يجمع شملكم ونشوف فرحكم عن قريب .
على فكره بقيت قعدتى هنا 3 مرات الصبح وبعد صلاة الضهر وبعد المغرب كل مره لاتتجاوز 5ق ومعاكم وبس .
اشوفكم على خير غدا صباحا ان شاء الله .
( اهو لسه سامع كلمه موجهه لاحمد مش فى الدين معاملتك للمكوجى الولد بيعامله كأنه شغال فى دايرة ابوه جيل ما يعلم بيه الا ربنا ).
مدحت

أميرة يقول...

هههههههه ربنا يباركلك فيهم جميعا يارب

والله فرحتني انك اخدت كلامي بجد ورديت عليا

بس هقول لحضرتك كام حاجة كده

- الخلاف في ابسط حاجة لاكبر حاجة .. من اول انتي صحيتي متأخرة 5 دقايق ليه لحد مين اداكي سلطة تنفذي قرار مصيري كده!! و ما بينهما كان الله به عليما .. ما علينا

- جملة كل اب بيكون عايز ابنه يكون احسن منه علي عيني وراسي .. بس اللي بيعملوه ملهوش علاقة بتنفيذها و تطبيقها.. لما تهد في ابنك و تحطم نفسيته و دائما وابدا هو غلط وانت الصح .. مستحيل تقولي ان دا اسمه بناء
ومش عايزة ازود في النقطة دي بالذات علشان كلامي مش هيعجب اي حد

- بتتكلم حضرتك علي الفضائيات .. ايه المرجعية التانية اللي تحت ايدينا ندور فيها علي الحق .. لما واحد بيتكلم في برنامج يسأل و يتمسخر ليه يدخل الحمام برجله الشمال؟؟ هو مش من حقه يسأل ولا علشان اللي قاعد دا عارف المعلومة دي من زمان يبقي محدش يستاهل يعرفها .. دا مثال بسيط ويقعد المقدم والضيف يضحكوا علي بساطة الاسئلة .. مهي دي في حد ذاتها مصيبة لما تبقي الحاجات الصغيرة دي مش معروفة و لسه عايز تحط اساسات عمارة انت تخيلت انك خلاص هتسلمها علي متشطبة .. العيب علي مين ؟؟؟؟ حد يقولي .. أسأل ميييييييييييييين يا ناس !!!!!!!!


- لا من 20 سنة كنت زي ما حكيت كده بشوف جدتي وهي فاتحاها طول النهار و في النص الصبح بتغير علي برنامج الي ربات البيوت ومسلسل مش فاكرة اسمه و نرجعلها تاني بتعليم القراءة زي ما قلت و التواشيح والابتهالات والتسجيلات القديمة .. كلها حاجات مينفعش تتمسح من الذاكرة .. في برنامج بسمعه وانا مروحة بيتكلم عن الاسرة جميل اوي بس بيعامل الناس انهم في المدينة الفاضلة .. احلام يعني مستنية التحقيق دا ان اتحققت .. يارب يوم تتحقق

- علي فكرة انا علي استعداد اسمع الكلام الطيب من الصغير والكبير بس الكلام اللي يدخل القلب واكيد لو الكلام طيب هيدخل عالقلب علي طول .. دا رأيي والله اعلم


- صلة الرحم دي الله اعلم بيها .. مش هتجمل واقول قادرة عليها .. بس زي ما قلت نفسي اكلم اخويا اقوله بس ازيك واخبارك ايه والاقيه بيتكلم مش قلقان من سبب المكالمة لحسن يكون حصل حاجة لحد .. نفسي الاقيه لما احتاجه ولا حتي لو مش محتاجة مش حقي دا ولا بطلب كتير ..

انا مش عارفة دا عند ناس تانية ولا لا بس اللي شايفاه من القريب للغريب مش بيعرف حد الا لمصلحة حتي لو مصلحة معنوية لمجرد انه يحس انه مرغوب فيه من الناس ... يعني لازم تدي وتاخد و تدي الاول قبل ما تسال هتاخد ايه من مين

بالله عليك مش صدق الله لما سماها دنيا

أميرة يقول...

وبخصوص احمد معلش خده بالهداوة

قوله انت يعني علشان باباك مدير :) مهو ممكن كنت تكون مكان الولد دا .. تحب حد يعاملك كده و بعدين مع احترامي لشخص احمد :) الولد دا بيعمل و بيكسب قوت يومه يعني اولي بالاحترام مش بياخد مصروفه من باباه .. لو منفعش النص الاولاني انقل علي التاني بلاش التاني دا في الاول

وقوله من لا يرحم لا يُرحم والله الرحمن الرحيم

موناليزا يقول...

اليس ياجميلة ليه تفكرى اصلا فى كل الحاجات دى
احنا اتفقنا قبل كده اننا عايشين فى الدنيا يعنى مش متوقعين منها حاجة حلوة لانها دار ابتلاء
هونى على نفسك وماتشيليش نفسك فوق طاقتها
واسعدى بوجود سيف فى حياتك مهما كان الوضع ولاتلتفتى لاى شئ اخر
لان ببساطة انتوا الاتنين من حقكم تقضوا اجمل الاوقات مع بعض بدون اى شئ يعكر هذا
تمنياتى لكما بكل الخير

أميرة يقول...
أزال المؤلف هذا التعليق.
أميرة يقول...

مفيش حد قالي لما طفل حد يعتدي عليه يروح لمين يشتكيله؟؟

محدش يقولي يروح لابوه او امه .. هو ممكن لو مكانوش هما المعتديين .. ولو كانوا .. الله يلطف بعبيده

jonoon 3aqel يقول...

"مفيش حد قالي لما طفل حد يعتدي عليه يروح لمين يشتكيله؟؟"

دي حاجة المفروض يتم تعليمها للطفل..
لأن لو محدش فهمه و قاله

" لما تصيير مشكله او لما يصيير موضوع خطير..ما تخفش..انا هوقف معاك و اساعدك ..تعال و قولي ع اللي عايزه بدون خوف..و هساعدك"

لأن لو محدش فهمه ده..يفضل الطفل تايه..و يشيل همه ف قلبه..لحد ما حد يلاحظ و يسأل...دا لو في حد يلاحظ...

الله موجود يا اختي...

لكم تحياتي
Maybe Soon

غير معرف يقول...

سلام عليكم وصباح النور على بنتى وعلى الراجل الجدع .
يا ست الكل المسلسل كان اسمه ( عيلة مرزوق أفندى ) وهواستمر سنين طويل كان فعلا بيمثل العيله المصريه المتوسطه بكل ما فيها ومن خلاله كان ممكن تلاقى حل لكثير من المشاكل اللى موجوده فى البيوت المصريه .
الافندى احمد حاولنا نعرفه امبارح (ودى الفضل لامه بصراحه ) معنى المعامله فى الاسلام وعلى فكره استمرت المناكفه بقرار حاسم انه ماحفظش السور المقرره يوميا فى الاجازه وربنا يهدى .
بقولك ايه يا كابتن ان شاء الله كده عاوزينك معانا فى شهر قبراير بجد والله شد حيلك وربنا جنبك بقيتوا جزء من حايتنا يارب يا غالى يكرمك ويديك الصحه والعافيه ... وجمع شملك على أ طيب بنوته ومن غير اى مجامله فى مصر بس وصيها علينا فى أسئله صعبه بتخلى الواحد يضرب لخمه .
مدحت

أميرة يقول...

Maybesoon
وان شاء الله فيري سون

"دا لو حد لاحظ "

عايزة اقولك ان محدش فاضي يلاحظ اي حاجة في اولاده و كتر خير الدنيا لو عرف ان كان ولاده اكلوا ولا لا .. دا اصلا لو اهتم يعرف .. بالرغم من ان في ناس كتيرة بتهتم بس ممكن حتي لو حكالهم يعتبروها لعب عيال .. اوهام .. بتحلم .. مش فاهم حاجة .. لو قعدت اتكلم من هنا لبكرة هتلاقي تبريرات كتيرة اوي .. بيتهيالي من جواهم بيكونوا نفسهم تطلع اوهام علشان مش يواجهوها..

من يمكن شهر ولا اكتر علي قناة فضائية كان في برنامج بيناقش القضية دي .. و اللي كانوا موجودين كل واحد بيقول لا لا دا لو حصل لابني هعمل و هسوي بس انا ابني مستحيل يحصله كده.. منين جاب التأكيد دا .. الله اعلم .. الله يلطف

ربنا معاك

أميرة يقول...

وعليكم السلام ورحمة الله وبركاته

حلوة أ دي :) شغالة بردة :)

انا افتكرت امبارح اسماء شخصيات بس تاهت مني مرزوق دي :)
الله ينور عليك هي عائلة مرزوق .. كنت بحبها دي ويوم الجمعة الصبح كنت بسمع ابلة فضيلة :) زمان باه

طب انا عايزاه من ال20 سنة اللي فاتوا :)
وكمان عيد ميلاد سليم الشهر دا وسيف اللي بعده :) لا مفر منهم

يا رب يرجعلنا النهاردة قبل بكرة وهو سليم معافي وفي احسن حال ان شاء الله


علي فكرة انا بغبط الولاد الصغيرين دلوقتي علشان في اهل كتير بقول يختاروا يودوهم دور تحفيظ القرآن .. و ما شاء الله الدور دي بقت منتشرة نوعا ما..ربنا يرزقنا جميعا حفظه :)

بس انا المعلم بتاعي يفوقلي كده و ربنا يديله الصحة والعافية و يعيني عليه :)

علي فكرة الاسئلة دي مش صعبة جنب حقايق كتيرة بنغمض عنينا عنها
ومعلش ان كنت بطلع عقدي عليكم:(

عاشــــــ النقاب ـقــــة"نونو" يقول...

لا طبعا كلها لها رد
المفترضان اي خلاف ما بينوجهات النظر يكون يتناقش بهدوء مغلف باحترام وب\يا تقنعني يا اقنعك المهم انه لما يكون خلاف ديني ما يبقاش فيه سب ولا اباحة ونتكلم بادلةوبطريقة اكون فاهماها الاول قبل ما اناقش والا اسكت لحد ما نوصل
ما عرفتش يبقى خلاص فيه احترام للانسانية
والتعامل بما يرضي الله
الخلافات في اي مجال تاني ما بتبقاش حساسة زي الدينوان كان الغلاف لابدوانه يكون واحد هو الاحترام
الاذاعة بقى للاسف الكلام منهجي بشدة وساعات فعلا الواحد يتوه منهم
ربنا يصلح الحال
تحياتي

أميرة يقول...

والله يا نونو مبقاش في الطريقة دي و مبقاش في حد عنده خلق ولا احتمال لحد ما يستني يقتنع ولا يدي فرصة للي قدامه يقتنع

هي بقت الاقوي بيفرض رايه واي حاجة مش جاية بالتراضي اكيد بيبقالها اعراض جانبية

وطبعا موضوع الخلافات في وجهات النظر فيما يخص الدين .. فحدث ولا حرج ..مرة بتكلم مع واحدة كبيرة فقلت صلاة الفجر ..قالتلي سنة الفجر قولتلها لا اقصد فرض الفجر قالتلي مفيش فرض للفجر في صلاة الصبح .. و جدال و تمسك بالراي علي حاجة هي هي نفسها اللي بتكلم عليها مهي نفس الصلاة هي اتربت انها صلاة الصبح وانا مقتنعه انها صلاة الفجر.. في الاخر قالتلي ايش فهمك انتي يا بنت امبارح انتي هتخترعي من دماغك

طبعا سكت قولتلها الله اعلم مني ومنك

علشان كده سألت ارجع لمين لما اعوز حاجة ؟؟ ولا لما احب استفسر عن حاجة اروح لمين ؟؟؟

غير معرف يقول...

كل دى كتابات حصلت وانا ما كنتش هنا دى عاوزه قعده طويله .. اخبار ابنى ايه يارب تكون بخير يا غالىى .. زى بعضه مشغوا فى مشروع غدا كشرى وده عاوز عك كتير ... هرجع أقرأ كل كلمه .. اشوفكم على خير

غير معرف يقول...

سلام عليكم
اهلا ببنتى الغاليه وابنى الحنين قريت كل حرف وكل كلمه هنا ( وطبعا لاحظت) يارب يابنتى ده يبقى يوم المنى مش هاقول كتير غير ان شاء الله هاتكونى أم رائعه يا بنتى .
مدحت

أميرة يقول...

وعليكم السلام

لاحظت ايه باه مفهمتش دي :)

يسمع منك ربنا دي أمنية غالية

ههههه دي طلعت بحرف ال أ بردة :) يلا بشرة خير :)

أ من عندي و ال م من عنده :) عايزين نستلف ب من حد :)

يارب

غير معرف يقول...

صباح الايمان بالله والخير والحب والامل .
زى بعضع بس المهم انى فهمت حاجه خير ومين عارف يمكن ربنا كريم وتبقى بشرة خير
هو سليم عيد ميلاده كام يناير انا عندى احمد بكره 31 يناير يكمل 13 سنه
عقبال يارب ماتكون كل ايامك هنا وسرور .. صبح الورد يا كابتن زى بعضه انته عارف قلب الاب كلمت بنتى الاول مع انه مفروض يكون انته الاول مش هالخبط نفسى انتوا الاتنين واحد .. يلا ياااااااااارب يكون يوم جمعه يقبل دعائنا فيه ويارب يلم شملكم .
مدحت

مجاهد يقول...

حلو الدعاء دا :




يا مقلب القلوب والابصار


يا مدبر الليل والنهار


يا محول الحول والاحوال


حول لحالنا لاحسن حال
------------------------
أمين
------------
"من الصعب مواجهة المشكلة والتعامل معها خاصة لو كانت مشكلة إعتداء على الطفل مثلا.....وكثير من الأمهات والأباء لا يبالون أو لايتصورون أنه قد يحدث هذا لأبنائهم....
طيب عندى سؤال
هى شكل علاقة الأبن أو البنت بأمها وأبوها إيه علشان الأبن أو البنت يبقوا عندهم الجراءة علشان يقدروا يصرحوا بالمشكلة دية؟
ونقدر ننقذ ما يمكن إنقاذه
--------------------
طيب أعتقد دور النعامة اللى بتدفن راسها فى الرمل أسهل وأيسر كتير
بس برده الشر هيطولك لو ماواجهت الموقف بشجاعه
---------------
يالله الرحيم إحفظنا من كل سوء

أميرة يقول...

السلام عليكم

سليم 13 فبراير وسيف 13 مارس :) وسبحان الله الاتنين جايين يوم الجمعة يعني مفيش مفر :) غرامة لا بد منها :) وامهم بعد بكرة :) مش قادرين يستنوا لما نقبض حتي :)

وسيف بردة كان 13 ديسمبر .. رقم 13 دا له مكانة خاصة جدا في القلب مع اكتر 3 بحبهم في الدنيا :)

كل سنة واحمد طيب و في احسن حال يارب ..سلملي عليه كتير و اعمله حاجة بيحبها علشان يفرح اليوم دا علشان خاطري :)


سليم هيتم 5 ان شاء الله و سيف 3 :) نفسي اوي ان مكانش هيحضر يوم سليم يحضر يوم سيف :) سبحان الله الاتنين سيف الكبير وسيف الصغير فيهم كتير من بعض ..اه ابو 3 سنين دا شخصية بردة :)

أميرة يقول...

والله يا مجاهد .. شكل العلاقة دا مأساة ملهاش حل .. في ساعات اهل كتير بيحاولوا يقربوا من ولادهم بس بردة بتفضل المسافة بينهم بعيدة

وفي اولاد بيحاولوا يقربوا من اهلهم ويعافروا لحد ما نفسهم يتقطع و برده بيفضلوا بعاد..

وفي ناس معندهاش استعداد لا تقرب ولا تحاول .. الحلو والوحش فيها متساوي في نظرهم .. حتي الحلو بقي مر نفس مرارة الوحش .. والاسباب كتيرة


كلام الانسان وهو برة المشكلة اكيد اكيد مختلف عن اذا كان جوة المشكلة و لا قدر الله علي احد يكونله ابن في مشكلة زي دي .. حتي لو الانسان هو صاحب المشكلة ان شاء الله هيلاقي اللي يعينه علي مصيبته و يساعده علشان يعرف يعيش الحياة من غير ما يخسر اكتر من اللي خسره..

المواجهة يا مجاهد من عدمها تخضع لاختلافات في شخثية كل فرد عن الاخر .. قد تكون انت شجاع كفاية بالاعتراف بمشكلتك و غيرك يمكن ميقدرش حتي يواجه بيها نفسه

ربنا يعافيك ويعينك علي جهادك :)

بيني وبينك انا لو اتحطيت في موقف مشابه سواء انا ولا حد صغير جه يستنجد بيا انه حصله كده بجد والله معنديش ادني فكرة ممكن اتصرف ازاي !!

الله يلطف بينا ويكفينا جميعا كل سوء ويحفظنا من كل شر

غير معرف يقول...

سلام عليكم
تعرفى انى قلت لواحد غالى عندى اووى انك ان شاء الله هاتكونى ام رائعه يارب يكرمك ويجر بخاطركم انتو الاتنين ...
حاضر وغلاوة بنتى الكبيره عندى هاعمل التورته بايدى بس يارب تطلع كويسه ليه زمان ما عملتهاش ربنا يستر .. عقبال تورتة عبد الله يااااارب .

غير معرف يقول...
أزال أحد مشرفي المدونة هذا التعليق.
غير معرف يقول...

الحمد لله ايوه يا راجل نورنا كده
هاقولك ايه ده انا ما حتش خالص النهارده ده لان اليس قالت اعمله الحاجه اللى بيحبها وقلت حاضر عشان كده ما نزلتش اول حاجه كان الاعداد للحوواشى( عشان محمد وصل امبارح بالليل وبيحبه) وده عاوز ااقعد عشان افرم اللحمه واتبلها واسيبها ساعتين تلاته فى التلاجه والتانيه حكاية التورته دى خلتينى اكون متردد فيها على كل حال انا هعملها ولو فشلت امرى لله هاشترى غيرها والله المستعان ويعدى اليوم ده على خير وادينى موجود وهاوفيكم بالاحداث اولا بأول .
مراسلكم فى اسيوط
مدحت الله يعطيه العافيه

أميرة يقول...

ان شاء الله تطلع حلوة :)

انا عايزة حقي ناشف ومش هتقل عليكم ..

هي دعوة صغيرة في جوف الليل معروف فيها ايه ولمين :)

مش طماعة اهو او يعني استغلالية حبة صغيرين علشان حاجة غالية اوي :)

غير معرف يقول...

يااااااااه
اول تعليق كان من طنط (ربنا يجبر بخاطركم يابنتى ).
وانا بقول يارب يقبل منى فى كل لحظه بتيجوا على بالى وفى كل نقاش لنا ويارب يكرمكم .
مدحت

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع