طلب صداقة

للحظات طويلة مكنتش عارفة ادخل المدونة و حسيت اني خسرتها زي حاجات كتير خسرتها ووجعني الاحساس دا جدا

اكبر العيوب حاليا كتر الكلام .. بتتكلمي كتير .. بترغي .. 

و اكبر اكبر العيوب بقي وجودي ذاته في نفس المكان :)

من فترة مش طويلة عايزة اقولها او اطلبها مش فارقة ... محتاجة صديقة ... واحدة توافق تصاحبني 

لا اكبر مني ب 20 سنة زي اللي موجدات في حياتي حاليا و بيعاملوني اني بنتهم و لا اصغر فمتفهمنيش و تبقي كل افكارنا مختلفة وبعيدة جدا عن بعضها

اكيد في الفضاء دا كله في حد محتاج حد يصاحبه !!

ماذا تفعل لو كنت مكانه؟!

سألني زميل علي غفلة .. 

لو الواحد فاضله شهر ويموت .. اقصي طموحاته يعيش الشهر دا ازاي؟!

لقيته سؤال محير فعلا.. الدنيا بتجبر الواحد يتصرف تصرفات علي انه هيعيش فيها ابدا .. و النزعة الايمانية تحكمها ساعات بيضعف فتفتكر انك بتعمل للنهاردة و بكرة و بعده وبعده وبعده.... 

طيب اللي بيغش و يكدب ويزور و يقتل حتي .. وضعه ايه لو اتسأل سؤال زي دا؟!

الدراما عموما صورتالاجابة علي انه تاب و اناب و يبتدي يصلي ويصوم ويستغفر و يصلح غلطاته و يطلب العفو والسماح من اللي حوليه....

لو في الحقيقة دا هيحصل ..

ايه انسب حاجة الواحد يعملها؟؟؟ .. بجانب الاستغفار وطلب العفو والسماح من الله علي ما ارتكب و اخطأ في حق الله وفي حق نفسه!

سؤال محير جدا بصراحة!

خوف

الخوف من فقدان عزيز .. مشاعر أشد لعنة من الفقد ذاته

عبء و راح

لما تعوز تتخلص من كل ذكرياتك لازم تعمل زي ما بيقول الناس تقطع عرق وتسيح دمه
مش المفروض تسيب ديل لاي موضوع منتهي فيه الكلام وملوش رجعه
وعلشان محدش بيتعلم ببلاش .. معملتهاش الا لما اتعلمتها
فات كتير اوي وانا سايبة حاجة معلقة 
ان حد يسال هي ليه معلقة او يعفيني من مسئوليتها 
لحد ما حصلت مشكلة الاستقالة و اكتشفت اني هاخد عبء زائد بدون اي اهتمام من اصحابه !!
و صبرت بعدها شهر واتنين لحد ما الصدفة خلتني ازيح العبء دا بعد ما اتأكدت ان ما حك جلدك الا ظفرك 
فعلا مفيش حد هيسأل علي المية اللي بتنقط من حنفية طول ما صاحب الحنفية سايبها بايظة ومش بيصلحها
وحصل 
وسبحان الله فجأة العبء ظهرله صاحب و مطالب و يادوب كتر خير الدنيا اني ابقي بس منفذ للمطالب!!
بس للأسف بجد .. كان في وخلص .. بطلنا .. شطبنا 
 بجد اول مرة احس في المرحلة دي اني اتاخرت اوي في الموضوع ده .. مكانش لازم يتساب كده طول الفترة دي .. علي الاقل السنة ونص اللي فاتوا !

يلا 

عبء وراح .. راح مش علشان عبء مادي اكتر منه عبء نفسي بفتكره وبيفكرني بنهاية في منتهي السوء لحاجة كانت في منتهي الراحة

اند اوف فضفضة :) 

طيف ذكري

وحشتني المدونة 

نسيتها 

او الظاهر اني مش بفتكرها الا في الازمات 

جالي طيفها في خيالي لقيتها وحشتني 

علي الاقل هي الحاجة الوحيدة اللي باقية من السنين اللي فاتت في بالي ... كله راح مره قبل حلوه :) الحمد لله

كويس انك تنسي حاجة كانت في يوم مهمة و لما تفتكرها ترجع تلاقيها فاكراك :)  معادش في من دا 

2013 دي جابت معايا قرارات مصيرة جامدة جدا

لاول مرة في حياتي و فجأة استقلت و انزاح من قلبي هم رهيب

لسه في شوية معلقات كده بس فل يعني .. بكرة أحسن طالما جاي جاي ولو حتي أحسن لغيري

وطني الأكبر

افتكرت مقالة احتفظت بيها يوم نشرها ..

مازالت قابلة للنشر بس بروح اشد اصرارا علي تغييرها من قلة قليلة جدا في كل مجتمع من مجتمعات هذا الوطن الأكبر ..

بارك الله في عزمهم و عزيمتهم و نصرهم و أيدهم علي من عاداهم 

إن مع العسر يسرا

من مقالة ابراهيم عيسي (دستور 2 أغسطس 2010)

اعاد كتابة كلماته بما يليق بالمأساة التي نحياها الشاعر محمود عبد الله

                                                وطني (نصيبي) الوطن الاكبر 

يوم ورا يوم (أزماته) بتكتر 

(وانكساراته) مالية حياته 

 وطني (بيُنهب وبيُستعمر)

وطني وطني 

وطني يا (حارق) حبك قلبي 

 وطني يا (هم) الشعب العربي 

ياللي ( هويت ) بالوحدة الكبري 

بعد ما شفت جمال الثورة

إنت (غريب)

(صوتك بعيد)

عن الوجود كله 

عن الخلود كله 

يا وطني 

(صعب يا جرح) يا مالي قلوبنا 

(صعب يا حلم ومات في حياتنا ) 

 (ساكتة يا جامعة يا خادعة ) شعوبنا 

( فاشلة يا أسوا شيء ) في حياتنا

 (يا خلاف دايم بين أخين)

بين (إيران) وبين البحرين 

في اليمن ودمشق وجدة 

نفس غنوة 

 (لأتعس ) وحدة 

 (فرقة) كل الشعب العربي 

 قوميتنا الي (بنمحيها) 

 اللي حياتنا (دمار) حواليها 

 يا وطن (حارق اهله وناسه ) 

 (جنة بينعم فيها أعاديها) 

شوفوا (العراق ) بعد العدوان 

 ( وبكره سوريا والسودان ) 

(سكت) الشعب (وخطوته تاهت ) 

 (ضاع الحق وكفته مالت) 

( لما اندفن الحلم العربي) 

 وطني يا (أغني) وطن في الدنيا 

 وطني يا (ممنوع) من الحرية 

 ( يا وطن مسلوب مدخراتك) 

( يا اللي في ايد الشر ضجية ) 

 الصوت صوتك (ناطق غربي) مش صدي شرقي ولا صدي (عربي) 

 ياللي ( بتُنهب قدام عيني ) 

 ياللي ( في قلب الذل راميني ) 

 انت ( نصيبي ) يا وطني العربي 

 وطني يا (راضي) علي استعمارهم 

وطني يا (شارب) كل (مرارهم) 

( ليه بتخيب ظننا فيك؟ ) (ليه بتخاف) إنك (تواجههم؟) 

الاستعمار (وياك دي بدايته) 

 (بيك راح ييجي زمانه ووقته) 

 ( في لبنان وفي السودان) 

( بيقسم جيش الطغيان) 

 وده من (صمت) الشعب العربي  

وطني يا (ثروة حيتان ناهشينها)

(وطني يا غنوة الغرب ساجنها ) 

( إمتي كرامتك ترجع ليك؟) 

 ( مدخراتك مين هايصونها ؟)

وطني يا (منهوب) عزه وخيره 

يا وطن باني المجد ( لغيره) 

 ياللي ( مالكش في أي ريادة) 

 يا وطن كله ( هوان وبلادة ) 

 وطن (السلب) الوطن العربي 

 وطني يا زاحف  (لانكساراتك) 

 يا اللي حياة (الذل) حياتك 

 في (دارفور) وفي ( غزة الحاير) 

لسه هاتكمل (تصفياتك) 

 إحنا وطن ( علي طول متهدد) 

 احنا وطن (يلطم ويعدد) 

 وطن (الشجب) الوطن العربي 

وطني (نصيبي) الوطن الأكبر...

لا للمحاكمات العسكرية للمدنيين: شرعية المحاكمات العسكرية للمدنيين = بطلان التأسيس...

لا للمحاكمات العسكرية للمدنيين: شرعية المحاكمات العسكرية للمدنيين = بطلان التأسيس...: القاهرة في  29 /11/2012 شرعية المحاكمات العسكرية للمدنيين = بطلان التأسيسية ! يبدو أن   أعضاء الجمعية التأسيسية تصورو...

العدل مرفوع ... حتي حين!

ما بين ليلة والتانية يتقلب حال من حال لحال!!

كنت معزومة رابع يوم العيد علي خطوبة ولد اعرفه 
العزومة جتلي قبل العيد باسبوعين تقريبا 
و كنت فرحانة بيه جدا لاني بحبه اوي وهو ابن حلال ويستاهل كل خير .. طايش حبتين بس غلبان جدا و الدنيا قسيت عليه كفاية .. يكفيه انه لا اب ولا ام ولا اهل يركن عليهم في حاله .. المهم 

يشاء ربنا اني امرض من اول يوم عيد و لمدة طويلة مخرجتش من البيت و حتي مكنتش اقدر اكلمه اعتذرله اني مش هقدر احضر الخطوبة رغم ان مكانه مش بعيد و اني كنت فرحناله جدا

وانشغاله ورا انشغاله (حلوة ومرة) مكلمتوش ولا عرفت اخباره لحد امبارح بليل 

كلمني و قالي انه من قبل العيد و لحد امبارح بس مكانش يقدر يتصل بيا ولا باي حد تاني لانه كان محبوس!!

انا بساله كليتك اخبارها ايه ؟

سمعني غلط وافتكر بسال علي خطيبته فقالي محصلتش الخطوبة اصلا و ابتدي يحكي حكايته

قبل العيد بكام يوم ولاد في الشارع اتخانقوا مع ناس علي قهوة قريبة من مكان سكنهم .. و الظاهر كان معاهم مطاوي .. بس محدش اتعور ولا حتي اتضرب في الخناقة كانت كلام وبس .. جت "الحكومة" زي ما وصفها هو (الداخلية البلطجية بوصفي انا)

جت الحكومة لمت الولاد كلهم اللي في الشارع و طلعت فوق في مكان سكنهم لمت كل الولاد اللي فيه بردة و منهم اللي كان نايم واللي كان بيذاكر ومنهم القصر اللي لسه في مدرسة اعدادي

لموهم و رموهم في الحبس .. اتصلوا بمدير السكن دا قالوله اللي حصل قالهم طيب هبعتلكم محامي و لما كلم الظابط في التليفون وقتها قاله لا دول بس هيستنوا للصبح و يخرجوا .. و التاني صدق و قفل تليفونه و نام و في ولاد  ( مسئولين منه قانونا ) بايتين في الحجز لمجرد الداخلية البلطجية حابة تعمل منظر في المنطقة

ليه عايزة تعمل منظر؟؟

لان الكلام دا كان بعد ما اتخانقوا مع الباعة الجائلين في ميدان الجيزة و قتلوا واحد منهم "21 سنة" الله يرحمه .. و ظابط اتضرب و "هيبة الشرطة" اتهزت في المنطقة

فقرروا يرجعوها انهم يلموا اكبر كم من الشباب في المنطقة في الخناقة دي .. وحصل

المحضر اتكتب علي انهم اعتدوا علي السلطات و انهم اتسببوا في ارهاب مواطنين و حيازة اسلحة و تهم حلوة من بتوع الايام دي .. 

الجميل كمان .. انهم خلوا اللي علي القهوة (الطرف التاني في الخناقة ) .. يشهدوا علي العيال كلهم ان كلهم كان معاهم سلاح و هددوهم .. حتي اللي كان نايم في سريره - روحه كان طايره هناك باين .. حتي القاصر !!

و اتحبسوا العيال كلهم اكتر من شهر و اخلي سبيل كام واحد منهم امبارح و لسه في محبوسين علي اعتبار ان الحكم في القضية يوم 1/5/2013 يعني كمان 6 شهور!!

الحكاية مش مستغرباها .. دا طبعهم و "هيبتهم"

بس اللي عز عليا الولد وهو بيقولي " مش زعلان اني اتحبست .. عادي.. زعلان اني مظلوم والله وملقيتش حد يقف جنبي يقول الحق اني مكنتش هناك اصلا"

 اكيد ملقيتش رد ..

والا كنت هقوله معلش يا ابني علشان يمكن تكون ذنوبنا اكتر من الناس اللي قبلنا فاترفع عنا العدل بذنوبنا!!!

اقوله ايه دا وبقاله 18 سنة بيتمرمط من "الحكومة" اللي في اي مكان تاني علي الكرة الارضية المفروض تكون سنده و ظهره بدل ما تبقي دايما سبب في التنغيص عليه!!

اضطريت اقوله معلش في زيك الوفات مرميين في السجون في كل المحافظات ولا حد عارف عايشين ولا اتاخدوا من بيوتهم اتقتلوا .. و في غيرك كتير ماتوا اتاخدوا من الشارع او من بيوتهم  كبار و صغيرين ولا حد عارف لهم طريق 

الظلم ساد و سود عيشتنا

قادر ربنا يرفع عنا البلاء و يجيرنا في مصيبنا  و يقصم الظالمين جميعا

ولسه الموت له شوق في اختبار صبرنا علي الابتلاء

اللهم إنا نسألك الرضا بعد القضاء والصبر علي البلاء 

العدل

وقعت في هوة سحيقة ما بين ايماني بمعتقد وجود عدل علي الأرض وما بين الظلم المستشري بين جنباتها

البشوات بيقولوا عليها مثالية .. ازاي البحث عن العدل في الارض والمطالبة بيه بقت مثالية تسخروا منها؟

اكيد ربنا مخلقش الارض ورفع عنها العدل .. اكيد موجود في صور ما باشكال ما حتي لو مشفنهاش 

بس والنبي متقوليش انه مش موجود .. انا معتقدة فيه حتي لو معيشتوش او مشفتوش في اللي حوليا 

اكيد علشان ربنا العدل .. هينزل علي الارض اشكال من صفاته سبحانه 

اكيد بشكل ما في ولو اجزاء بسيطة مشتقة من العدل زي ما في لسه شوية رحمة فاضلين 

اينعم بتتضاءل فعلا بين البشر بس محدش يستجري يقول ان مفيش رحمة في الارض 

يمكن اللي اقصده عدل البشر مع البشر .. بس دا كمان مش شاكه فيه بنسبة ما 

لسه في ناس شوية حاسة انها علي الاقل ظالمة غيرها ( اعتقد )

اكيد والله لسه في احساس بان وجود العدل دا مش وهم ولا تطلع للمثالية 

"اعدلوا هو اقرب للتقوي"

وليسقط الظالمون في قعر الجحيم

دعاء جديد

اللهم لا تشغل عقلى بما يقلقه

ولا تشغل قلبى بمن لا يرحمه

ولا تشغل وقتى بما يغضبك ولا ينفع

هي .. وانا

مرات الظابط عايزة توصل لرئيس الجمهورية تشتكيله انها زعلانة علي حال البلد 
علشان المحلات رافضة تقفل 10
علشان الناس صوتها عالي في الشارع
علشان الظابط بقي ممكن يتقاله لا
وعلشان المليونيات اللي هي مش عارفة الناس بتنزل فيها ليه
وعلشان الزبالة اللي مرمية قرب بيتها 
وعلشان خايفة علي جوزها الظابط وابنها الظابط
وعلشان شايفة هيبة الشرطة اهم من لقمة العيش 
وعلشان شايفة الشعب دا بهايم لازم الكرباج يمشيهم


منتظر مني اشوف لها وسيلة اتصال بمرسي 
معرفتش ارد اقول ايه 
قلتلها انتي زعلانة ليه؟
جوزك معاكي و ابنك في حضنك و قاعدة في بيتك معززة مكرمة 
حياتك لا زادت ولا قلت من سنتين اللي بتشتكي منهم 
لا نقصتي ولا زيدتي


قالت زعلانة علي البلد 

اضطريت اقولها ملعونة دي ارض بتاكل عيالها 

لما يبقي اللي نايم في حضن مراته وولاده وهو قاتل و بسببه ام واب وزوجة و عيال ضاع منهم معيلهم و ضناهم بسبب انه حيوان وقتلهم .. لما يتعدم و ياخد جزاءه هتفرحي
لما يبقي الحرامي يقوم من مكتبه و يدخل يبارك برجله السجن مكانه الطبيعي وسط زمايله  هتفرحي
لما تبطلي تقولي علي الشعب دا بهايم لازم الكرباج يمشيهم هتفرحي لانه هتشوفي فيهم اللي حفر في الصخر علشان يلاقي لقمة عيشه و من كتر حفره طلعله ضوافر يحمي بيها اللقمة دي مش لانها قوته لكن عشان عياله اللي وراه ميموتوش من الجوع 
لما تحسوا كمجتمع معاه سلطة ان العسكري اللي بيشيلك الشنطة دا مكانه مش تحت خدمة مرات الظابط لانه مش سخرة و بني ادم مش ألة
لما الناس اللي مسحولة و عايشة في المجاري العفنة يقولوا لا .. اللي قالوا لا بدالهم ماتوا خلاص و هما معملوش حاجة .. لما دول ينطقوا يقولوا لا بصوت عالي وياخدوا حقهم 

لما نبقي وطن بحق وفيه قانون و عدل

هي زعلانة علي البلد .. بس انا من البلد

نشنتي علي الحد الغلط تشكيله زعلك من قطيع البهائم للاسف .. سوري

100 مسا ونهار :(

100 مسا ونهار ....

هي هي

 مصر مبارك

مصر مرسي

الا ما في مواطن مصري من المسحولين ورا لقمة العيش حس بفرق واحد ولو في حقه في المعاملة الآدمية

الداخلية هي هي بلطجية

المرور زفت و قطران

التموين بقي فوق طاقة الطبقة المتوسطة حتي!! و لا عزاء لكل الشرائح اللي قبلها .. معلش مش معتبرينكم من المواطنين الصالحين اللي ليهم حقوق في البلد دي

الصحة زفت و تجيب المرض و الاطباء حقهم في اضرابهم مشروع و ليهم الف حق وحق والمريض بيدخل بمرض بيطلع عايز عزل صحي من كتر الاوبئة اللي بتجيله دا لو طلع اصلا

النبي ترزقنا بشوية انسانية و كرامة و حبة ذمة و ضمير

 لاجل النبي في البلد دي يا رب

وحشية بلا عقاب

مصر: وحشية بلا عقاب ولا رادع: الجيش المصري يقتل المحتجين ويعذبهم دون محاسبة

سور الأهلي :(

                                  إقتــــــــلني 

                                 عمر قتـــلي 

                                  مــا هيعيـد

                                 دولتــك تاني

                                
                                   البقاء لله

                                 معني الحياة 
                                   هــــــــــو 
                           إنك تدي للحياة معني


                       رحمة الله علي شهدائنا الأبرار

يسقط مبارك :(

دي في ظهر منزل كوبري اكتوبر 
أمام اتحاد الكورة (معقل حبة فاسدين تقال)

 مكتوبة جديـــــــــــد!!!

شكلنا كده هنفضل متمسكين ب "يسقط مبارك"

حتي أخر العمر 

يسقط كل مبارك

حنين

المدونة دي من 2008 !!
الايام بتجري بسرعة كده ليه

جه علي بالي مدونين ومدونات كتير اوي ..
كنت بحبهم وبحترمهم كبار وصغيرين :) 

دعيتلهم سرا 
و بشكرهم علنا ( بالنية يعني )

بس بدون تحديد لان كتير منهم ميعرفوش اساسا اني اعرفهم :)

المهم تكون الناس كلها دايما بخير

تعليق جديد متأخر جداااا

بقالي كتير فعلا بشوف ان في ناس بتيجي من مدونة بهائي مصري و مش عارفة الاقي رابط لانهم بيوصلوا لتدوينتين كنت كتبتهم في 2009 عن تجربة خاصة لي و تعليق خاص بردة علي حاجة من وجهة نظري وقتها

ولسه حالا مكتشفة الرابط فين

ولما قرأت الرابط و عرفت منين جه و سبب الاستهزاء وتفهمت الموقف ..

حقه بصراحة ولا انكر عليه حقه .. 
حقه يزعل من طريقتي 

و حقي ازعل من طريقته 

المفيد ان كل واحد عمل دا في مكانه .. هو اشار للمدونة قولا و فعلا بدون ما يكتب الرابط ..  كتر خيره

كنت اتمني لو اكتشفت الرابط دا وقتها علشان اقوله اني وقتها اتصدمت في وجود واقع معلن زي دا و انا كبيرة كده و معنديش عنه فكرة  زي صدمات كتيرة متتالية حصلتلي و اتصدمتها لاني مكنتش اعرف ان في حاجة زي دي في الدنيا ... رد فعل طبيعي يعني 

عقيدتك انت حر فيها ما لم تؤذي غيرك

من الحاجات اللي غيرتها فيا  الثورة دي اني بقيت بقبل اللي مختلف معايا اشد الاختلاف لانه مش هو عدوي الي ان يأخد مكان عدوي و يحاربني بالدين .. 

والي ان يجي في المربع دا ..

 فهو شريك في الوطن وبس!!

هو تعليق وقف في زوري سواء شافه او مشافهوش .. 

((كل اللي فوق دا مش مناقشة ولا قبول بمعتقد حد .. دا مجرد تعليق علي اسلوبين لشخصين معجبهمش اسلوب بعضهم))

انــــــا سطـــــــرين - رائعة .. أسفلت

"أنا ستيكر ملزوق عليه "مين المقصود
أنا عين بتشوف، أنا لسان بيقول
أنا ميكرفون يعلى بيه صوتك
أنا سماعة تلغي بيها سكوتك
أنا فكرتي عايشة و إسمي اتنسى
أنا ضربة و جلدة و جسمي اتهرى
أنا وش بيضحك غلاف كتاب
أنا لسة كاتب لبكرة جواب
أنا وسط البلد أنا قلبي اتولد
أنا قلة عدد على كوبري الأسد
أنا خفة دم باسم يوسف
أنا صورة جدي على فلوسي
أنا السلمية بمفرداتها
والحرية بمنشوراتها
مش محتاجني عشان تعبر
أنا اللي اتقال بس إنت أكتر

انا سطرين بتقراهم كدا على الصبح
يسيبوا جوا منك شئ
بقابلك ع الحيطان صدفه
ف كل مكان و اي طريق
انا الصوت اللي قال تغير
انا رأيك انا فكرك انا التعبير
انا روح راحت علشانك
انا صوت واصل لمكانك
انا عين بتشوف الظلم و ساكته بقالها كتير
حواليك دايما تلمحني
مش شرط انك تعرفني
انا ايد بتساعدك توصل .. علشان احلامك تكمل
انا سكه هاتخدك ناحية نور و محبه و خير

أنا اللي ماكنش ليا وجود و ظهرت
أنا علم بلدي في ايدين صحاب الأرض
أنا صوت عود مش مبسوط
أنا بيت شعر مش موجود
أنا مزيكة سكوت
أنا صندوق "نعم" و "لا" للتعديلات
أنا دمعة كل أم ابنها مات
أنا صوت تشجيع خارج من الإستاد
أنا بوستر مترشح للانتخابات
"أنا تصريح على "كلنا خالد سعيد
"أنا المظاهرة اللي قالت "الشعب يريد
أنا مانشت إتكتب بالبنط العريض
خرطوش، رصاص مش هيفيد
أنا "أسفلت " على تيشيرت إنت لابسه
أنا كلام إنت كاتبه، قول اللي حاسه
"أنا يافطة عليها "الشعب اختارك
"أنا محطة "الشهدا" بدل "مبارك

Translated lyrics:

I'm a sticker that says, "Who's the Target?"
I'm the eye that sees; I'm the tongue that speaks
I'm the microphone that makes your voice heard
I'm the speaker that cancels out your silence
My idea is alive but my name is forgotten
I'm a hit, a lash; my body had enough 
I'm a smiling face; I'm a book cover
I'm still "writing a letter for tomorrow"
I'm Downtown; my heart is born
I'm the group of people (trapped) on the "lion's bridge"
I'm Bassem Youssef's sense of humor
I'm my ancestor's picture on our currency 
I'm all the words that are encompassed by peacefulness
I'm the brochures of freedom
You don't need me to express...
I'm all that's been said, but you are more!

I'm two lines you read in the morning
They leave something inside of you
I see you by coincidence (in the writing and drawings) on the wall 
In every place or in any way
I'm the voice that called for change
I'm your opinion, I'm your thoughts, I am expression

I'm the soul that died for you
I'm the voice that reaches you
I'm the eye that has seen injustice and has stayed silent for so long
You always notice me around you
It doesn't matter if you recognize me
I'm the hand that helps you accomplish your dreams
I'm the road which leads you to light, love and goodness 

I'm the one who had no presence and appeared
I'm the flag of my country in the hands of her countrymen
I'm the unhappy sound of the Oud
I'm a missing line of poetry
I'm the music of silence
I'm the voting box for constitutional amendments
I'm the tear of every mother who lost a child
I'm the sound of cheers coming from the stadium
I'm a candidacy poster for the elections
I'm the statement s written on "We are all Khalid Saeed"
I'm the protest that said "The people want...."
I'm a newspaper headline written in bold
Bird-shots, bullets, won't have an effect
I'm "Asfalt" on the t-shirt that you're wearing
I'm the words that you've written; say what you feel
I'm the banner that says, "The people chose you"
I'm the metro station

"The martyrs" which replaced "Mubarak"