حديث واية وخبر وسؤال وجدال

"سمع رسول الله ‏ ‏صلى الله عليه وسلم ‏ ‏يقول :‏ 

‏ثلاثة أقسم عليهن وأحدثكم حديثا فاحفظوه قال :

ما نقص مال عبد من صدقة 

ولا ظلم عبد مظلمة 

فصبر عليها 

إلا زاده الله عزا 

ولا فتح عبد باب مسألة 

إلا فتح الله عليه باب فقر أو كلمة نحوها 

وأحدثكم حديثا فاحفظوه 

قال

 إنما الدنيا لأربعة 

نفر عبد رزقه الله مالا وعلما 

فهو يتقي فيه ربه ويصل فيه رحمه ويعلم لله فيه حقا 

فهذا بأفضل المنازل 

وعبد رزقه الله علما ولم يرزقه مالا 

فهو صادق ‏ ‏النية ‏

 ‏يقول لو أن لي مالا لعملت بعمل فلان

 فهو ‏ ‏بنيته ‏

 ‏فأجرهما سواء 

وعبد رزقه الله مالا ولم يرزقه علما

 فهو ‏ ‏يخبط ‏ ‏في ماله بغير علم 

لا يتقي فيه ربه 

ولا يصل فيه رحمه

 ولا يعلم لله فيه حقا 

فهذا بأخبث المنازل 

وعبد لم يرزقه الله مالا ولا علما

 فهو يقول لو أن لي مالا لعملت فيه بعمل فلان

 فهو ‏ ‏بنيته

 ‏ ‏فوزرهما سواء "‏..  

اخرجه احمد وابن ماجه

 و يقول الله عز وجل :

وَإِذَا رَأَيْتَهُمْ تُعْجِبُكَ أَجْسَامُهُمْ وَإِنْ يَقُولُوا تَسْمَعْ لِقَوْلِهِمْ كَأَنَّهُمْ خُشُبٌ مُسَنَّدَةٌ يَحْسَبُونَ كُلَّ صَيْحَةٍ عَلَيْهِمْ هُمْ الْعَدُوُّ فَاحْذَرْهُمْ قَاتَلَهُمْ اللَّهُ أَنَّى يُؤْفَكُونَ سورة المنافقون ، الأية : 4

 يقول الدكتور عائض القرني : 

"وإذا شاهدت هؤلاء المنافقين أعجبتك أشكالهم وهيئتهم؛ فعندهم فصاحة، لكن في قلوبهم فقر من الإيمان، وفي نفوسهم وحشة من الحق، مع سخف عقولهم، وانعدام فهمهم، فتراهم كالخشب المعتمدة على الجدران، يابسة لا حياة فيها ولا نماء، يظنون كل صوت من حادث أو نازلة واقعاً بهم لسوء ظنهم، ومعرفتهم بقبح عملهم، ولجبنهم وهلعهم، فهم أشد الأعداء، وألد الخصوم، فخذ الحيطة من مكرهم، واحذر من خداعهم، أخزاهم الله، وأهلكهم وأذلهم كيف ينحرفون عن الهداية، وينصرفون عن الحق إلى الغواية والباطل."

 

----------------------------------------- 

خبر عن احدي الوزيرات بخصوص ان الدولة لا تحظر لبس الحجاب علي العاملين بها (المناصب العليا) بدليل وجود وزيرة محجبة!! 

التعليقات علي الخبر عادية و متوقعه ما بين مؤيد ومعارض

 

اول مرة في حياتي اكتشف ان في دماغ وعيون شايفة الحجاب بالنظرة دي : 

 

"بوابين"  قالها واحد كتعليق " اهلا بالبوابين"

 

رد عليه واحد تاني -علي اد ما فاكرة من الصدمة-

 

"بالظبط كده ..عندك حق .. زمان كنت تلاقي المحجبة دي مرات البواب ، الخدامة .. دلوقتي متعرفش الخدامة من الهانم .. الله يرحم زمن البشوات والهوانم.. بدل زمن الحاج والحاجة .. دول حتي استبدلوا بابا وماما بالحاج والحاجة .... "

 

اظن كان في كلام تاني بس مش فاكرة الا دول بالنص

 

اول مرة اعرف ان في ناس شايفة الحجاب من منظور انها مغطية شعرها زي مرات البواب ولا الشغالة !!

 

بس لما ركزت شوية لقيت والله الكلام معقول .. 

 

بس علي الاقل الشخص دا كان جريء كفاية انه يعلن تفكيره .. 

 

علي الرغم من ان في محجبات متخصصات بيعافروا ليل ونهار علشان يطلعوا موديلات للمرأة المسلمة تريحها وتناسب كل الاذواق  ومش كلهن علشان في بيبقوا ماشيين لابسين فرح وعلي الرغم من اعتراضي علي تلتين ان مكانش اكتر من اشكال الحجاب اللي ملهاش علاقة بستر جسد المرأة بلبس واسع فضفاض لا يشف ولا بكشف الوجه والكفين فقط وانما كاشفين الرقبة وما يليها والله يسامحه اللي اخترع البادي اللي خلاهم يلبسوه و كانهم لابسين مايوه مش محصلش الشرعي التقيل وانما مبين تفاصيل المعصم حتي بلاش باقي الجسد!!

 

الاية لاني سمعتها النهاردة الصبح مع اللي قريته امبارح من تصريح مع الحديث اللي لقيته من شوية .. فصلوا سؤال مهم اوي اخرجني عن عزوفي عن الكلام في الايام العجاف المليئة بالابتلاءات .. 

 

السؤال :

 

هل المرأة المسلمة مفروض عليها ليل ونهار انها تقف تقول انا مقتنعة بحجابي ليه ولا تدافع عن انها مش متخلفة وانها حقها تستر زي ما في اللي بيفضح بمزاجه ولا عن انها مش مسئولة ان في واحد ملتحي بيقولوا عليه سني بيسب ولا ان في منقبة واقفة مع واحد علي الكورنيش؟!!!

 

لأمتي ؟؟؟؟؟

 

لأمتي اللي بيغلط بيشيل المسلمين كلهم وزر غلطته ؟؟؟ 

 

 

من يومين بالصدفة البحتة جه في حديث مع زميلة موضوع العطور والحديث الصحيح اللي بينهي المرأة عن انها تتعطر حتي لا تثير شهوات الاخرين !! وبالنص الحديث : "أيما امرأة تعطرت فمرت على قوم ليجدوا ‏من ريحها فهي زانية" رواه أبو داود وابن ماجة والترمذي والنسائي وقالوا حديث صحيح

 قالتلي انا مش مقتنعة 

قولتلها دا حديث صحيح 

 مش مقتنعة بردة .. ايه اللي فيها لما احط برفيوم واحس اني ريحتي حلوة والناس تشمها وتحس نفس الاحساس

 قولتلها مش كلامي علشان اجادلك .. ما أتاكم الرسول فخذوه وما نهاكم عنه فأنتهوا !!

 وبعدين ايه اللي مش مخليكي مقتنعه .. لما تعدي رائحة ما نفاذه امام حد ..

 

 تقدري تحجري علي تفكيره وخيالاته انه لا يفكر في صاحبة الرائحة دي ولا يتخيل علي اقل تقدير ان متصرفش بالفعل مش بس خيال او قول ؟؟ تقدري؟

 قالتلي مش مقتنعة 

-المشكلة انها ازهرية و كبيرة في السن يعني تخلفني ووالدها كان شيخ الله يرحمه-

 قالتلي في حاجات تفسيرتها بتبقي غير ما الناس بتاخدها علي المعني الحرفي .. زي النساء ناقصات عقل ودين 

 قولتلها صح بس الحديث دا ملهوش تأويل أخر وعندك من المصادر الانترنت والكتب الكتيرة اللي تقدري توثقي بيها صحته والموقف اللي اتقال فيه واتقال ليه ... 

 وانتهي الحديث مع الاسف 

 و ذكرني بأحاديث اخري مع شخصيات عامة و اخري عادي باختلاف ثقافاتهم و تعليمهم و حتي فهمهم عن الله ... بس النتيجة واحدة 

 ربنا يهدي حالنا جميعا

همسات الى النفوس المنكسرة

الهمسة الأولى

أيها المصاب الكسير.. أيها المهموم الحزين.. أيها المبتلى.. أبشر وأبشر ثم أبشر.. فإن الله قريبٌ منك.. يعلم مصابك وبلواك ويسمع دعائك ونجواك.. فأرسل له الشكوى.. وابعث إليه الدعوى.. ثم زيِّنها بمداد الدمع.. وأبرِقها عبر بريد الانكسار.. وانتظر الفَرَج.. فإنَّ رحمة الله قريبٌ من المضطرِّين.. وفَرَجه ليس ببعيدٍ عن الصادقين

*******

الهمسة الثانية

إن مع الشدة فَرَجاً.. ومع البلاء عافية.. وبعد المرض شفاءً.. ومع الضيق سعة.. وعند العسر يسراً.. فكيف تجزع؟

*******
الهمسة الثالثة

أوصيك بسجود الأسحار.. ودعاء العزيز الغفَّار.. ثم تذلّل بين يدي خالقك ومولاك.. الذي يملك كشف الضرِّ عنك.. وتفقَّد مواطن إجابة الدعاء واحرص عليها.. وستجد الفَرَج بإذن الله.. أمَّن يجيب المضطرَّ إذا دعاه ويكشف السوء

*******
الهمسة الرابعة

احرص على كثرة الصدقة.. فهي من أسباب الشفاء بإذن الله.. وقد قال النبي صلى الله عليه وسلم : داووا مرضاكم بالصدقة.. حسَّنه الألباني وابن باز.. وكم من أناسٍ قد عافاهم الله بسبب صدقةٍ أخرجوها.. فلا تتردد في ذلك

*******
الهمسة الخامسة

عليك بذكر الله جلَّ وعلا.. فهو سلوة المنكوبين.. وأمان الخائفين.. وملاذ المنكوبين.. وأُنسُ المرضى والمصابين.. الذين ءامنوا وتطمئنُّ قلوبهم بذكر الله ألا بذكر الله تطمئنُّ القلوب

*******
الهمسة السادسة

احمد الله عز وجل أن مصيبتك لم تكن في دينك.. فمصيبة الدين لا تعوَّض.. وحلاوة الإيمان لا تقدّر بثمن.. ولذة الطاعة لا يعدِلُها شيء.. فكم من أناسٍ قد تبدَّلت أحوالهم.. وتغيَّرت أمورهم.. بسبب فتنةٍ أو محنةٍ ألمَّت بهم

*******
الهمسة السابعة

كن متفائلاً.. ولا تصاحب المخذِّلين والمرجفين.. وابتعد عن المثبِّطين اليائسين.. وأشعِر نفسك بقرب الفَرَج.. ودنوِّ بزوغ الأمل

*******
الهمسة الثامنة

تذكر أناساً قد ابتلاهم الله بمصائب أعظم مما أنت عليه.. ومِحن أقسى مما مرت بك.. واحمد الله تعالى أن خفّف مصيبتك.. ويسَّر بليَّتك.. ليمتحِنك ويختبِرك.. واحمده أن وفّقك لشكره على هذه المصيبة.. في حينِ أن غيرك يتسخَّط ويجزع

*******
الهمسة التاسعة

إذا منَّ الله عليك بزوال المحنة.. وذهاب المصيبة.. فاحمده سبحانه واشكره.. وأكثِر من ذلك.. فإنه سبحانه قادر على أن ينزِع عنك العافية مرة أخرى.. فأكثر من شكره

*******
الهمسة العاشرة

ان الدنيا طبعها هكذا لا تحب أحدا.. تأخذ منه.. وإن أعطته شيئا فستأخذه منه عاجلا أم آجلا فلا تأمن لها.. ولا تحزن

*******

لا تشتكي إلى مخلوق 

واشتكِي إلى حبيبك الذي لن يرد يدك صفرا خائبتين

اشتكي إلى من يسمع أنينك والناس رقود 

ويرى دموعك والناس عنك غافلين 

ويسمع شكواك ومن حولك لاهين
لا تحزن فالله معك باق لن يتركك أبدا

اللَّهُمَّ كَمَا سَتَرْتَ ذُنُوبَنَا وَعُيُوبَنَا فِي الدُّنْيَا فَاسْتُرْهَا يَوْمَ القِيَامَةِ؛ يَوْمَ الحَسْرَةِ وَالنَّدَامَةِ، يَوْمَ يَرَى كُلُّ إِنْسَانٍ مِنَّا عَمَلَهُ أَمَامَه، بِرَحْمَتِكَ يَاأَرْحَمَ الرَّاحِمِين

يارب افتح لمن فتح رسالتي باب سروره ويسر له في الدنيا اموره.. وفي الفردوس الاعلى قصوره.. ومع الحبيب محمد نوره.. واجعل الجنة اول وآخر مروره

*******

من طـارق فـاروق

فالله خير حافظا وهو ارحم الراحمين

اسوء التجارب اللي مرت عليا في حياتي .. او واحدة من شديدي السوء والسواد

الحمد لله علي كل حال

هحكي حصل ايه علشان انا حاسة اني شايلة حمل من افكار و هواجس وحاجات كتيرة حتي مش عارفة انطقها 

يوم زي اي يوم اجازة .. في البيت ومفيهوش غيري و كنت لسه بفكر اني عايزة انزل اروح اعمل البطاقة اللي مأجلاها بقالها كتير .. 

جرس الباب رن مرة 

مش هرد 

رن تاني رنة طويلة  واصلا جرس الباب عندنا قمة في الازعاج و سخيف جداااا

مش هرد 

النهاردة كام 1 يمكن بتاع النور يمكن الايجار يمكن حد عايز حاجة 

انا طبيعي مبردش وكمان غالبا شكلي لوحدي في البيت - الباب مقفول 

وصوت الجرس عمال يرن كتير و جرسات طويلة اوي

افتكرت ابويا نزل ونسي المفاتيح 

قمت علشان افتح و بتاكد انه ابويا 

بصيت في العين السحرية لقيت اتنين رجالة

واحد شكله عادي لابس قميص اسود او كحلي - حاجة غامقة علي اد ما شايفة الاضاءة وحشة بالنهار

وواحد تاني لابس تي شيرت فاتح او بيجامة مش مفسره علشان مكانش واضح

اللي بقميص بنضارة دهبي و شكله بتاع 50 تقريبا و واقف علي جنب الباب و شايفه البروفايل بتاعه و ايده علي الجرس مش بيفصل

والتاني بيبص من الشباك اللي جنب الباب و بعدين خبط علي الباب من فوق 

انا كل دا ومش مطلعه صوت ومش منورة اي حاجة مفيش اي فرق يعرفوه بيه ان حد جوه او بيبيص من العين السحرية 

اللي خبط خبط فوق اوي في الباب -استغربت بيعمل كده ليه 

وبيخبط بالراحة اصلا !!!!!

مفهمتش وبما اني لسه صاحية اعدت اجمع مين دول

تكونش العربية جرالها حاجة ؟ طيب ما انا ببص علي الشارع مسمعتش اي صوت غريب تحت

يكونوا عايزين ابويا ؟ طيب مهو الناس عارفة انه مش موجود بالنهار في الشغل

يكونوا غلطانين في العنوان ؟؟ طيب مهو الرذالة دي ليه عمال يدوس علي الجرس بالغباء دا ليه

والتاني اللي بدقن اللي واقف علي جنب بيمسح علي العدسة بتاعت العين السحرية .. 

يمكن فاكر انه هيشوف فرق .. 

بس انا باصه فمش هتفرق والبيت مضلم مش هيبان ضوء ولا سمع صوتي وانا بقرب من الباب علشان التاني مش عايز يبطل رن علي الجرس

و فجاءة لقيت اللي بدق دا بياخد حاجة من جيبه ولا من ايده التانية  

مش باين حاجة حديدة طويلة او سكينة طويلة

و بيحطها ناحية الكالون بتاع الباب

لحظة وقف بيا فيها الزمن 

دا فاضلة دقيقة

نص دقيقة

كام ثانية 

ثانية و يبقوا قدامي 

الزمن وقف بيا 

حتي صوتي اتحشر معرفتش اطلع صوت 

قلتله ايوة  في ايه

اد ما قدرت انطق واد ما طلعلي صوت 

كل دا في لحظة وانا بقول فيها حاجات كتيرة 

يعني انا نهايتي بيني وبينها باب خشب

يعني انا هيجرالي حاجة دلوقتي واكيد مش حاجة كويسة

مهما بلغ خوفهم ولا يكونوا بس حرامية مش هيسيبوا حد شافهم و مش هيبسيبوني لاسباب كتيرة تانية 

يعني كده ولا كده ضايعة 

كل دا دار في بالي و قلت يارب لو مكتوبلي اموت

 اموت مستورة يارب 

متفضحنيش بأذاهم

اللحظة اللي قلت فيها ايوة في ايه بصوت عالي دي كنت بعدت عن الباب وانا بقولها

اللي بدقن دا كان نزل لما رجعت ابص من العين السحرية 

و التاني اللي بنضارة اتعدل بدل ما كان واقف جنب الباب بقي في وشه وبعد خطوتين

كل دا حصل في ثانية

قال هي دي شقة محمد صلاح 

وانا في وسط كل اسود افكار ممكن تخطر علي بال حد قولتله حاجة زي اللي عايز يسال علي حد يبقي بيحاول يكسر الباب .. مش فاكرة والله قلت ايه بس حاجة زي كده

اتلجلج و قال بابتسامه كسر باب ايه الظاهر العنوان غلط و انا كنت بمد ايدي اقفل سلسلة الباب من فوق والترباس مش عايز يقفل 

جريت علي الشباك اشوف شكلهم ولا لو نزلوا اقول للناس ولا حتي اتاكد من اني مكنتش بحلم 

ملقيتهمش الظاهر خرجوا من الباب علي الناحية لتانية 

من ضمن تلت ولا نص ساعة جرسات .. عيشت 5 دقايق ولا اسود من كده

معرفتش اعمل ايه ولا اقول لمين ايه 

بصيت علي الشارع من ورا الشباك لقيته عادي 

في الناس اللي بتبقي فيه عادي و هادي و الدنيا رايقة في الشارع 

محدش سمع حاجة 

محدش شاف حاجة 

وقف بيا الزمن شوية مكنتش عارفة افكر اتصرف ازاي دلوقتي .. اكلم مين اقول ايه

التليفون رن بنت خالي حكيتلها اللي حصل و كل اللي قولتله ان في حد حاول يفتح الباب ..

 علشان متتخضش وعلشان اقنع نفسي ان الموضوع وقف لحد كده .. 

صليت الضحي و قعدت  ساكنة شوية و افتكرت ان ربنا نجاني من حاجة في علمه هو وحده كان هيجرا منها ايه 

صليت ركعتين لله و قعدت استني .. 

مش عايزة اكلم امي اخضها ومش عارفة اكلم ابويا اقوله ايه 

كان في 2 رجالة حاولوا يفتحوا الباب؟؟ 

انتهيت لاني هسكت واستني لحد ما يرجع 

بعد ساعة ولا اكتر الجرس رن بس انا حاطه السلسلة 

و كنت حاسة كان مفيش حاجة و نجحت اني اقتنع انه كان بيتهيألي اللي حصل 

بصيت في العين السحرية لقيته ابويا 

بفتح الباب مش عايز يتفتح

شديته جامد مش عايز يتفتح

قولت لبابا زقه جامد من برة 

زقه كذا مرة مش عايز يتفتح

وبعدين اتفتح

قالي في ايه قافلة الباب كده ليه

كل العضلات والمفاصل اللي فيا سابت بقيت بحكي وانا بقاومي اني منهارش مش عارفة من الموقف ولا من اني كنت افتكرت اني نسيت واقتنعت ان مفيش حاجة ولا علشان كنت مستنية حد يجي يقولي مالك 

حكيتله وانا مش قادرة اخد نفسي من كتر ما انا متوترة و مش قادرة امسك نفسي من الدوخة علي الخوف 

مش فاكرة حصل ايه بعدها 

بس رجعت قعدت 

الخبر اتسرب 

امي عرفت

اخويا عرف

وجه

قال لازم نبلغ البوليس 

النجار كان بيصلح الباب

اكتشفوا ان الباب اصلا كان اتكسر و اتفتح

يعني الحاجة الوحيدة اللي انقذتني في اللحظة اللي بصيت فيها من العين السحرية عليهم 

ان السوستة اللي في الكالون علقت 

ستر الله الحافظ

فتحوا الباب ولا خدش ولا اي حاجة باينة ان الباب دا اتلعب فيه 

وكان فعلا اتفتح

و كان بيخبط من فوق علشان يخلع الجزء اللي جوه و تنهار مقاومة الباب و دا حصل فعلا

النص اللي فوق من الباب دخل جوه و حاولت ازقه علشان اقفل الباب كويس مكانش راضي وانا بحط السلسلة و هما واقفين برة الباب

هو بس ستر ربنا اللي حفظ 

المعلومات الجديدة خلتني بعد ما كنت هادية و بقيت كويسة و بقول خلاص حصل خير مفيش حاجة 

معرفتش ليه بفكر لو مكانتش السوستة دي علقت 

هما اصلا كانوا خلاص فتحوا الباب 

لو مكنتش قلت يمكن بابا اللي بيخبط كتير ونسي مفاتيحه 

كانوا دخلوا وانا نايمة 

لو كان صوتي فضل متحاش ومعرفتش انطق واقولهم في ايه 

كان زماني اكيد في عداد الاموات والله اعلم وان كنت افضل اموت عن انهم يعملوا اي حاجة تانية 

اللي نزل عليا قعدت اقول الحمد لله ان ماما مش هنا 

الحمد لله ان انا اللي جرالي كده مش ماما 

ستر ربنا انها مش بايته هنا 

ستر ربنا انها برة 

ستر ربنا انه نزل عليا بله و برود في النص لدرجة اني دخلت غليت لبن و فتحت التليفزيون ولحد ما ابويا رجع

ستر ربنا ان اللي حصل دا كان يوم سبت ولو اني مستغربة 

حد بالغباوة دي 

الناس اجازة السبت طبيعي 

حد يدخل يسرق الساعة 10 ونص الصبح ؟؟؟؟؟؟؟

بس بنت خالي قالتلي انهم قالوا حاجة زي كده في البيت بيتك انهم بيفضلوا يدخلوا يسرقوا من 9 ل 11

ستر ربنا في حاجة اغرب

الشقة اللي جنبنا فاضية من سنين و بعفشها 

الشقة اللي قدامها حاليا مفيهاش ناس و لسه يادوب مجددين فيها عفش البيت من اصغر لاكبر حاجة جديدة 

احنا في الدور الاول

كل الجرسات دي محدش سمع

كل دا محدش طلع السلم جايز بس محدش سمع لا فوق ولا تحت ؟؟

حياتي اتعلقت بسوستة الكالون اللي علقت في الباب فمتفتحش علشان كده الراجل حاول يزقها بحاجة حديد 

وهي لحظة كنت انا اللي هبقي في وشه 

ستر ربنا

كلمنا البوليس كويس

بسال اخويا كلمت حد تعرفه يعني 

قالي لا طلبت النجدة من الموبيل

فضل يستني شوية في البلكونة و نزل و طلع سال حد شاف حاجة .. مفيش 

شوية وقال انا ماشي عيشوا انتو باه 

فضلت مستنية من 2 ل 5 بعد صلاة العصر .. مفيش حد جه ...

البوليس 

النجدة

اللي بيغيثوا الملهوف

الغلبان اللي يستنجد بالشرطة 

مفيش

محدش جه ولا سال

و اتوجه كل اللوم والعتاب لي 

ليه مستغستيش بالناس برة ؟؟

ليه مصوتيش

ليه متصلتيش بحد ؟ 

ليه وليه وليه 

انا مكنتش ملحقتش افكر 

ولو فكرت حاولت امنع عنهم انهم يتخضوا وهما برة  .. 

اصلا مكنتش اعرف انهم فتحوا الباب فعلا  وكل دا

مكنتش اعرف ان صوت الجرس دا كان غلوشة علي اللي بيعملوه

مكنتش اعرف ان في شقة اتسرقت الاسبوع اللي فات من الشارع اللي ورانا 

عمارتنا فيها رئيس محكمة و لواء مخابرات سابق و دكاترة و ظباط جيش و شرطة !!!!!

دا احنا الدور الاول ايه البجاحة دي في عز النهار كده ؟؟؟؟؟؟؟؟

المصيبة اللي بجد من كل دول ان الصورة مش عايزة تروح من بالي

شريط عمال يعيد نفسه قدام عنيا 

مش عارفة انام 

بليل بعد ما بابا نام 

قمت احط السلسلة  لقيته هو قافل القفل اللي كان معلق معرفتش استعمله 

وقبل ما اخرج شغلت الراديو جنب الباب

استغفرت ربنا و حمدته

 و مرعوبة من فكرة ان دا حصلي علشان يحصلي انا بالذات 

علشان ربنا عايز يقولي حاجة مش عارفة افهمها 

الفكرة دي مجنناني

مش عايزة اشوف صورتهم في عنيا وانا مغمضة وانا مفتحة 

من عارفة انسي ولا عارفة افكر في حاجة تنسيني الصورة دي 

مش مركزة في اي حاجة و مش عارفة اعمل في نفسي ايه 

بالاكيد مكنتش هبقي مستعدة اموت علشان خايفة من ذنوبي

ممكن يرجعوا تاني و الفكرة دي هبلتني من كتر مهي مسيطرة علي دماغي 

محضر متعملش

محدش فاضي يعمله 

وفي الاخر تعليق اني انا اللي غلطانه لاني المفروض انا اللي اروح اعمل محضر علشان انا اللي شفت الناس دي 

انا مش عارفة اكتب اللي حساه بكل مرارته و الخوف اللي ماليه بس ربنا ما يوريها لحد 

مكنتش عايزة احكي حاجة بس مقدرتش 

مش قادرة اقول الكلام دا لحد

الاحساس وحش اوي خصوصا لحد عاش احساس قريب منه قبل كده